هتافات وأهازيج ساحة الحبوبي عشية انتهاء مهلة الناصرية

هتافات وأهازيج ساحة الحبوبي عشية انتهاء مهلة الناصرية

 ذي قار / حسين العامل
شهدت ساحات وميادين التظاهر في محافظة ذي قار والمحافظات العراقية الاخرى المنتفضة تحشيد وتصعيد غير مسبوق في الفعاليات الاحتجاجية بالتزامن مع قرب انتهاء مهلة الناصرية في الساعة الاخيرة من ليلة الاحد (19 كانون الثاني 2020 ) .

وقد تخللت تلك الفعاليات ترديد العديد من الهتافات والاهازيج التي تجسد وتؤكد عزم المتظاهرين على تحقيق جميع مطالبهم ولاسيما تلك التي تضمنتها المهلة والمتمثلة بترشيح رئيس وزراء وفق المعايير التي حددتها ميادين التظاهرات وتشكيل حكومة مؤقتة تمهد لاجراء انتخابات مبكرة تحت اشراف اممي فضلا عن محاكمة قتلة المتظاهرين.
ومن ابرز هتافات واهازيج المتظاهرين في ساحة الحبوبي عشية انتهاء مهلة الناصرية:
• اليوم المهله تخلص وين اتضم روحك.
• خل إيضم روحه اليوم المهله إتخلص.
• هالدنيه اليوم إمغيمه ، باﭽـر تمطر بالخضراء .
• هاي حـﭽـاية ومن ذي قار اليوم العطوه انشالت.
• العطوه اليوم اتخلص شيكض أولادچ يا ذي قار.
• هي بس هالليلة ومحسومة القضية ، حـﭽـاية وحده والحـﭽـوها الناصرية.
• اتحزم خويه اتحزم ، صيت اكتوبر هز الكون.
• الله يستر من باﭽـر راح نهز الكون .
• بالحبوبي وبالتحرير الملعب نفس الملعب.
• الساتر يبلع وادم بس غص بذي قار .
• هاي الحكومة يا شعب ﭽـذابه ، رادوها غابة واحنه اسود الغابة.
• داعشية ، داعشية ، هاي الحكومة داعشية ، سرسرية ، سرسرية هاي الحكومة سرسرية.
• غمان ما بيكم غيره غمان . والمقصود في الهتاف احزاب السلطة.
• الاحزاب همه وقيطاني.
• هاي اطلابه وعد ذي قار اشلون تفض وتخلص.
• اليوم الساحة تخوف متروسه ذيابه .
• الينشد عنكم كولوله ، احرار ما صرنه ذيوله.
• لا لمريكا ولا لايران اسمع ذي قار إشـكالت.
• ذي قار احنه شنهي امريكا .
• ذيل لوكي ، انعل ابو ايران لا ابو امريكا .
• ضد اهل الظلم ، ثورة ، ثورة احرار ، ثورة ، ضد الاحزاب ثورة ، ضد اهل الشغب ثورة .
• تاج تاج عالراس دم الشهيد الغالي .
• هايه شبابك يا وطن هايه ، ضحت إبدمها ورفعت الراية.
• احنه اول خط ما عبرونه.
• خلوني اموت بذي قار يهواي ظل بلندنك. في اشارة تهكمية على ثورجية الخارج.
• هلا يرباي ويرباي باكو وطنه.
• وردد المتظاهرون من عشائر ال زيرج ( اخوة باشا بكل تاريخ همه محيرين الظالم).
• فيما انشد عدد اخر من متظاهري محافظة ذي قار :
اليوم تفزع ذي قار نطلع نسدك يالجسر
منخلي واحد إيفوت اليوم نسدك يالجسر
اليوم تفزع ذي قار نطلع نسدك يالجسر
بزماط وكلنا وبزود نفزع نسدك يالجسر
اليوم تفزع ذي قار نطلع نسدك يالجسر
اليوم عدنه تموت نفزع نسدك يالجسر
اليوم تفزع ذي قار نطلع نسدك يالجسر
لو ينترس سجن الحوت نطلع نسدك يالجسر
اليوم تفزع ذي قار نطلع نسدك يالجسر
خل تدري بصرة وبغداد نطلع نسدك يالجسر
اليوم تفزع ذي قار نطلع نسدك يالجسر
نـكطع عليهم الامداد نطلع نسدك يالجسر
اليوم تفزع ذي قار نطلع نسدك يالجسر
صار الحـﭽـي كله عناد نطلع نسدك يالجسر
خل يعترض كل كواد اليوم نطلع نسدك يالجسر
اليوم تفزع ذي قار نطلع نسدك يالجسر
فدوه الولد والشباب نطلع نسدك يالجسر
كلهم زلم هم شجعان نطلع نسدك يالجسر
اليوم تفزع ذي قار نطلع نسدك يالجسر
ثورة العشرين تعود نطلع نسدك يالجسر
اليوم تفزع ذي قار نطلع نسدك يالجسر
بغدادنا كلها شهود نطلع نسدك يالجسر
اليوم تفزع ذي قار نطلع نسدك يالجسر
هدوا عليهم بِربُود نطلع نسدك يالجسر
 اليوم تفزع ذي قار نطلع نسدك يالجسر